محسن حسنين يكتب: ترامب يعزى حمو بيكا..!

لما شفت كمية البودى جاردات اللى داخلين سرادق العزاء وفى آذانهم السماعات التى بترصد دبة النملة ؛ وبيزيحوا الناس يمين وشمال..قلت فى نفسى والله الرئيس ترامب دا فيه الخير وصاحب واجب..فقد ترك كل مشاغله الكونية والحرب مع إيران ؛وجاى يعزى صاحبه وحبيبه حمو بيكا..!

لكننى فوجئت إن كل هذه الجاردات مش بتحمى ترامب ..دى بتحمى مطرب المهرجانات والبلح الأمهات.. ثروتنا القومية والعين الجوانية.. الأخ "مرزبة"..!

فمن الواضح إن بسلامته مستهدف لمنصبه الحساس جدا.. كرئيس لمجلس إدارة مراجيح مولد النبى..!
عندى سؤال ساذح محيرنى : هو مش عندنا مادة فى القانون بتجرّم إستعراض القوة..وترويع المواطنين؛ وللّا كانت موضة وبطلت.. ؟!افيدونا افادكم الله..؟!
هاأشتغل جراح قلوب..! بعد خبرة نصف قرن فى بلاط صاحبة الجلالة..نويت والنية لله إنى أسيب الصحافة اللى ما بتأكلش عيش ..وأشتغل جراح قلوب..إشمعنى أنا..؟!
فمن الواضح إن جراحة القلوب دى "زى شكة الدبوس" مش محتاجة شهادات ولا خبرة ولا يحزنون..!دا واحد ساقط ألسن؛ إشتغل جراح قلوب تحت سمع وبصر نقابة الأطباء وكل أجهزة وزارة الصحة اللى نايمة على ودانها.. وكسب الملايين....!
أنا بقى خريج أول دفعة من كلية الإعلام قسم صحافة تخصص عمليات قلب مفتوح ومقفول..يعنى مؤهل من مجاميعه..!!
يعنى مفيش حاجة تمنعنى من إنى أشتغل جراح قلوب وأنافس مجدى يعقوب..! على الهواء مباشرة..من حوش بردق ..! قال لها : وإنت مالك..؟!ردت عليه:ملة على جنابك..مالى فى جيبى.. هاأطلعه لك دلوقت..!!!هذه ليست وصلة ردح فى "حوش بردق" ..بل حوارعن "كلاب الشوارع" فى إحدى الفضائيات..!طبعا أنا مش ها أعلق خالص على الكلام دا..حتى لا تغضب منى "كلاب الشوارع ".. لامؤاخذة..!
سؤال ساذج: فين وزير الإعلام وفين رئيس المجلس الأعلى للإعلام وفين رئيس الهيئة الوطنية للإعلام من اللى بيحصل فى إعلام "ماقال لى وقلت له ياعوازل فلفلوا"..؟!أنا مش قصدى حاجة خالص لاسمح الله.. أنا بس باأطمن عليهم مش أكتر ..ربنا يخليهم لمصر..! واحد عاوز يركب التريند فبيقول إن الشيخ الشعراوى ليس مفتيا..!!ياااااه..إيه الإكتشاف التاريخى الخطير دا..؟!حضرتك كدا تستاهل عن جدارة تلبس "تاج الجزيرة" بتاع عم مرزوق العتقى....السلطاااااااانية..! فى هوجة قوانين الأسرة..واحدة على "الفيس بوك" بتقول إن طليقها ساب لها الشقة وإشترى شقة جديدة أكبر..فهل من حقها أن تطالبه بالشقة الجديدة وتسيب القديمة..؟!!!!أنا مش زعلان من الست ..أنا زعلان من اللى ردوا عليها..ليه يشتموها بالأب والأم..؟!