بروفة الموت".. تفاصيل أغرب 40 يومًا في حياة وحش الشاشة فريد شوقي

لم تكن حياة "وحش الشاشة" فريد شوقي مليئة بالدراما والأحداث الإثارة على شاشات السينما فحسب، بل امتدت هذه الحبكة الدرامية الغريبة حتى اللحظات الأخيرة من حياته؛ حيث عاش تفاصيل رحيله وشاهد حزن محبيه ورآى "بروفة" موته رأي العين قبل أن يترجل عن عرشه بأسابيع قليلة.

وفاة فريد شوقي الغريبة

يحكي الفنان عزت العلايلي، إنه اثناء تصوير فيلم "السقا مات"، كان فيه مشهد المفروض ان فريد شوقي ينزل فيه القبر، جهزوا التصوير، لكن فجأة ملقوش فريد شوقي، قلبوا عليه الدنيا لكن ملقاهوش.. وبعد ما التصوير خلص، ولغوا اللقطة دي، ظهر فريد شوقي، وسأله عزت العلايلي، كنت فين يا ملك، فقاله: "بص يا عزت، انا هدخل المدفن دا مرة واحدة بس في العمر"، في إشارة للموت.

لكن المفارقة ان فريد اللي خاف من نزول القبر ولو على سبيل التصوير، أذيع خبر وفاته وهو حي.. والناس راحت تعزي فيه وهو حي.

والقصة إنه سنة 1998 .. كان الفنان فريد شوقي تعبان .. وطلعت مذيعة القناة الأولى شيرين دويك .. قطعت الإرسال علشان تعلن وفاة الفنان فريد شوقي، لكن فريد شوقي مكانش مات أصلا.

يوم 17 يونيو 1998 .. توفي الشيخ الشعراوي .. ويومها برضه التلفزيون أذاع خبر وفاة فريد شوقي بالخطأ .. وبعدها اتصلت سهير ترك زوجة فريد شوقي ونفت خبر الوفاة وقالت إن الخبر غير صحيح.. فالتلفزيون طلع وصلح الخبر وقال ان الخبر اللي احنا ذعناه خبر كاذب.. بس كانت الناس كلها راحت على بيت فريد شوقي تعزي وتواسي..

فالتلفزيون بقى في ازمة .. يعمل ايه .. قالك احنا هنعمل حوار مع فريد شوقي في بيته.. وعلى سريره وكان فريد شوقي تعبان جدا يعني وهتشوف دا في الفيديو بتاع اللقاء.. وعملت اللقاء معاه سهير شلبي... وكان قاعد جنبه فاروق الفيشاوي اللي كان بيعتبره ابنه...

والخبر دا تسبب في اقالة رئيسة القناة الأولى ملك إسماعيل .. بس هو يعني ليه اصلا يذيعوا خبر فريد شوقي وهو حي .. بحسب مقال الصحفي وسيم عفيفي اللي نقل تصريحات ملك لمجلة الاذاعة والتلفزيون ، ملك بتقول: "دخل علىَّ أحد الأشخاص في مكتبي وقالي خبر وفاة الفنان فريد شوقي، وهى مذيعة زميلة، فأذعنا الخبر في برنامج مساء الخير، وأيضاً غيرت سناء منصور خريطة الفضائية المصرية وأذاعت فيلماً لفريد شوقي، ففوجئنا بابنته ناهد تكلم الوزير ورئيس التليفزيون وتكذب الخبر، وذهبنا فورًا لعمل لقاء معه في منزله بالهرم".

وفي رواية تانية، ان فريد شوقي كان تعبان في المستشفى فروحوه للبيت في عربية اسعاف، وحد ابن حلال سأل في المستشفى فقالوله فريد شوقي مات، والخبر وصل للتلفزيون، فقطعوا ارسال التلفزيون وطلعت المذيعة سهير دويك قالت الخبر .. فريد شوقي مات، وهو كان حي.. فالدنيا اتقلبت وكله طلع على بيت فريد..

وقال فريد شوقي في اللقاء مع سهير شلبي: "ظن الناس انني قد توفيت وسرعان ما انتشر الخبر في ماسبيرو.. التليفزيون بيفول عليا ويمكن دي البروفة الأولى للوفاة". وفي لقاء تاني عملته هالة سرحان، وكانت قاعدة جنبه نبيلة عبيد وكاتنت تبوس ايده طول الحوار..

في الفترة دي، كانت رانيا فريد شوقي حامل، وقعدت مع ابوها قبل وفاته، وقالتله عايزني أجيب ولد ولا بنت .. فريد شوقي كل خلفته بنات، وكان معروف بابو البنات، لكن هو قالها لا انا عايز بنت تاني.. ولما جات ولادة رانيا كان فريد شوقي مات زي النهاردة في 27 يوليو 1998.. بعد 40 يوم بالظبط من إذاعة الخبر بالخطأ... واللي زي ما قاله شاف بروفة موته.. وازاي الناس زعلت عليه..

رانيا جابت بنت فعلا.. وطلعت من المستشفى على قبر ابوها .. وقالتله أنا جبت بنت يا بابا وسميتها فريدة زي اسمك.. وحتى بنتها التانية سمتها ملك .. لان فريد شوقي كان لقبه ملك الترسو..

الغريب ان فريد قبل تعبه سجل لقاء مع فاطمة رشدي على سرير المرض، وراحلها المستشفي وهزر معاها، واتنازل عن اجره في الحلقة ليها، وخد بخاطرها علشان كنت بتمر بتعب وشبه ملهاش دخل.. والحلقة من الطف حقات برنامج "عملوني مذيع"، والحلقة دي حصل فيها عطلة واتذاعت بعد موت فريد نفسه، وقدمتها بنته رانيا.

الغريب اكتر ان فريد كان نفسه يعمله مسلسل بطله بياع روبابيكيا، بيخش البيوت ويعرف قصصهم وحكاياتهم، لحد ما هيلاقى كنز، وحياته تتقلب تماما، فريد كتب المسلسل بس مات قبل ما يعمله، قالك نجيب فؤاد المهندس يعمله ما هو صاحب فريد، وعمله المهندس فعلا وكان اخر مسلسل يعمله.