​من الكوشة إلى الحجز.. القصة الكاملة لسقوط كروان مشاكل ورفاقه

الداخلية كشفت الفضائح:

فرح "كروان مشاكل"..العريس واخوه "سوابق" والمعازيم "متحرشين"..القاعة "مخالفة" والنهاية الكل في الحجز!

عارفين "كروان مشاكل"؟ أهو ده اللي بيقولوا عليه "اسم على مسمى". الراجل قرر يعمل فرح في شبرا الخيمة، بس الحقيقة إنه معملش فرح، هو عمل "مهرجان للمخالفات"

الداخلية قامت بالواجب وكشفت المستور اللي كان بيحصل ورا الكاميرات والزفة الكدابة. في بيان رسمي اصدرته !

الزفة بدأت بـ "تكسير" وانتهت بـ "تحرش"!

الموضوع بدأ بفيديوهات منتشرة لناس بتزق في بعض قدام قاعة أفراح في القليوبية، والناس كانت فاكرة إن الجمهور ملموم عشان "النجم العالمي"، لكن الحقيقة إن التدافع ده تسبب في تلفيات في القاعة. والمفاجأة؟ إن الداخلية قبضت على 12 واحد من اللي كانوا هناك، مش بس عشان كسروا القاعة، لا.. دول طلعوا بيتحرشوا بالبنات في وسط الهيصة! يعني لا ذوق ولا أخلاق ولا حتى احترام لليوم.

القاعة "شمال" والعريس "سوابق"!

الداخلية لما فتشت ورا "الليلة الكبيرة" دي، اكتشفت إن القاعة اللي في شبرا الخيمة دي أصلاً شغالة من غير ترخيص، واتقبض على أصحابها الأربعة. أما العريس "صانع المحتوى" فطلع "له معلومات جنائية" (يعني مش غريب على الأقسام)، وده يفسر لنا ليه الفرح كان قالب على "خناقة شوارع".

العربية ولعت.. بس مش "عين" دي "غباوة"!

نيجي بقى للقطة "الأكشن" اللي قلبت الفيسبوك، وهي عربية العريس اللي ولعت. الناس قالت دي "عين وحسد"، بس الحقيقة طلعت ألطف بكتير. العربية ملك أخو "كروان" (وده كمان له معلومات جنائية وتم ضبطه)، واللي ولع فيها واحد صاحبه كان قاعد جنبه بيلعب بـ "شمروخ" جوه العربية! الشرز طار، العربية ولعت، والذكاء الاصطناعي البشري اشتغل في أبهى صوره.

الخلاصة..

وزارة الداخلية ضبطت اخو العريس، ، وصاحبه "بتاع الشمروخ"، و12 من المتحرشين، وأصحاب القاعة. يعني الفرح كله اتنقل "بيات وصياح" في النيابة العامة...